Mga alkalde suportado and fund rasing para kay Joselito Zapanta

SIYUDAD NG SAN FERNANDO - Suportado ng Liderato ng Pampanga Mayors’ League (PML) ang pinasimulang fund raising activity ni Pampanga Governor Lilia Pineda upang maisalba ang buhay ni Joselito Zapanta na isang kapampangan at kasalukuyang nahaharap sa hatol na kamatayan sa Saudi Arabia.

Joselito Zapanta.

Target  umano ng mga alkalde sa bawat bayan sa probinsiya na makalikom ng halagang hindi bababa sa dalawang milyong piso bilang pandagdag sa blood money na hinihingi ng mga kaanak ng napatay na Sudanese national.

Matatandaang ibinaba na sa 44 milyong piso ang hinihinging  blood money kasunod ng pagsuspinde sa pagpapatupad ng hatol na kamatayan kay Zapanta sa loob ng apat na buwan.

Ihinihayag ni PML president and Candaba Mayor Jerry Pelayo na nagkakaisa ang mga kapampangan upang maisalba ang buhay ni  zapanta.

Binigyang diin pa ni Pelayo na gagawin nilang lahat ang kanilang makakaya upang matulungan ang kababayang nahaharap sa malaking pagsubok sampu ng kaniyang pamilya.

Samantala, iminungkahi naman ni Apalit Mayor Jun Tetangco na isangkot sa fund raising activity ang lahat ng empleyado sa bawat munisipyo na nagkikisimpatya sa sinapit ni Zapanta sa bansang Saudi.

Naniniwala si Tetangco na malaki umano ang posibilidad na makalikom ng malaking halaga ng pera kung ang lahat ng mga Kapampangan  na magkakaisa para kay Zapanta.

Kamakailan naman  ay  binisita ni Governor Pineda ang ama at ang dalawang anak  ni Zapanta sa bahay nito sa bayan ng Bacolor upang personal na tignan ang kanilang kalagayan.

Binigyan ng pampahalaang panlalawigan ng scholarship grant ang dalawang anak ni Zapanta hanggang sa makatapos ang mga ito ng kolehiyo habang ang kanyang ama ay binigyan ng trabaho bilang driver upang matustusan ang kanilang pang araw araw na pangangailangan.